Ibisobanuro kubibaza Aho Umunyamakuru Ange de la Victoire ari Kubarizwa Ubu

Inyandiko ye bwite:

Benshi bakomeje kumbaza bati ko twumvise ngo uri gukorera mu Basaleziyani, mu bapadiri bivuze ko ugiye kwiha Imana.

Igisobanuro nyacyo nuko nta muntu numwe ukunda Imana utayiha ubugingo bwe ngo imuyobore cyangwa imushoboze kuyobora abandi.

Muri Iki gihe rero Ubu ndigukorera Abasaleziyani ba Don Bosco. Icyicaro cyacu giherereye Kimuhurura Impande ya IFAK.

Hanyuma rero nkorera muri Biro Ishinzwe Igenamigambi n’Iterambere mu Ihuriro ry’ Abasaleziyani ba Don Bosco rikorera mu Karere k’ibiyaga bigari (Salesian of Don Bosco of AfricaGreat Lakes-Planning and Development Office ) .

Iyi Bureau Ishinzwe gukurikirana no gutegura Imishinga y’iterambere n’Ibikorwa by’Abasaleziyani bibarizwa mu bihugu by’u Rwanda, Uganda n’u Burundi.

Ibikorwa byose by’Abasaleziyani cyangwa bya Bureau navuze ruguru byose bigendera ku ndangagaciro zasizwe na Don Bosco benshi muzi cyangwa mwumvise. Amateka ye nzayababwira mu nyandiko zitaha.

Mu ndangagaciro ze harimo kurangwa n’Ubumuntu, Ubugiraneza, gufasha n’Urukundo by’Umwihariko Urukundo rwe n’urubyiruko. Mu nyandiko Itaha muzasobanukirwa Aho yakomoye izo ngeso zikwiye kuranga buri wese.

Izo ndangagaciro ziyobora ibikorwa by’Abasaleziyani buri gihe uko hagiye gushyirwa mu bikorwa imishinga runaka cyangwa Ibikorwa runaka bifite Intego nyamukuru yo guhindura imibereho y’Umugenerwabikorwa haba ku mubiri ndetse na roho.

Uretse Ibikorwa birimo gutegurwa cyangwa byatangiye, hari Ibikorwa byacu bimaze Igihe kirekire byibanda ku rubyiruko no gufasha abakene n’Imbabare, Uburezi ndetse no kwiha Imana cyangwa ibyo benshi bazi nk’ibikorwa by’Abamisiyoneri.

Mu bijyanye n’Urubyiruko harimo kurwigisha amasomo y’Ubumenyi ngiro no guhanga Imirimo, uburezi mu nzego zitandukanye zirimo n’Iyobokamana no kwiha Imana, Gufasha Impunzi n’ababaye  ndetse n’Imyidagaduro ariko ifite Intego.

Ingero z’Aho ibikorwa byacu bibarizwa twavuga Ishuli rya IFAK ribarizwa Kigali,Kimihurura, Ikigo cyacu ari nacyo Cyicaro gikuru cy’Abasaleziyani mu Karere k’Ibiyaga bigari, Ikigo by’Abasaleziyani ba Don Bosco kibarizwa mu Gatenga ahazwi nko kwa Karlosi cyangwa Kwa Mutagatifu Charles Lwanga, Ishuli ry’Abashaka kuba Abasaleziyani cyangwa gutumwa Indi mirimo yo Kwiha Imana ribarizwa Kabgayi (Kabgayi-Postnoviciat), Amashuli y’Imyuga atandukanye n’ibigo birimo Don Bosco Muhazi n’ibigo bibiri biri Rango (Butare)-Butare Noviciat na Sacre Coeur de Jesus-Butare.

Muri Uganda ho Ibikorwa byacu bibarizwa Bombo-Namaliga aho ku Ishuli rya Saint John Bosco Kasana-Luweero hagatangirwa amasomo y’Imyuga n’amasomo mu Mashuli yisumbuye. Haranasengerwa hagakorerwa n’indi mirimo ya Paruwasi.

Hari Ikigo cya Don Bosco giherereye ahitwa Gulu, Igiherereye Namugongo, Kamuli ndetse n’ahitwa Palabek hari Inkambi y’Impunzi.

I Burundi Abasaleziyani bahafite ibikorwa ahitwa Buterere, Ngozi muri Burengo, Rukago hari Ikigo cya Marie Mère de Dieu naho higishirizwa n’Amasomo ajyanye n’ubumenyi ngiro.

Nubwo wenda hadatanzwe Ishusho yagutse ku mirimo yose y’Abasaleziyani mu Karere k’ibiyaga bigari ariko mu byukuri nakumvishaga ko Imirimo ari myinshi kandi yose igamije guhindura Imibereho ya muntu na Sosiyete n’ibimukikije ari nako abasha kwibuka kwegerana n’Imana kugira ngo nayo imuyobore azagire Iherezo ryiza.

Andi makuru yose wakwifuza kumenya ku Bikorwa by’Abasaleziyani na Bureau Ishinzwe Igenamigambi n’Iterambere wajya wandikira

Ange de la Victoire DUSABEMUNGU

Itangazamakuru n’Ikoranabuhanga

SDB-PDO Kigali Office

E-mail: vickange@gmail.com

Tel: +250 78 71 05 131